Подсолнухи посёлогындагы яңа төзелгән урамда ни өчен утлар янмый?

Күпбалалы гаиләләр посёлогы Подсолнухида күптән түгел Машиностроительная һәм Подсолнухи урамнары ясадылар. Өр-яңа асфальт, адым саен тукталышлар, җәяүлеләр юлы – барысы да бар. Шуңа да карамастан, посёлок халкы барыбер канәгать түгел. Алар әйтүенчә, юл буйлап урнаштырылган яктырткычларның берсе дә янмый, дөм караңгыда йөрергә туры килә. Бәла-каза булуы ихтимал, дип курка алар. 
“Шәһри Чаллы” редакциясе Әҗмәкәй авыл җирлеге башлыгы Марат Фазылҗановка шалтыратып белешергә булды. Ул: “Юллар сентябрьдә генә кулланылышка тапшырылды. Аны Тукай районына балансына куярга кирәк. Шул очракта гына “Татэнергосбыт”ка заявка белән чыгачакбыз. яктыркычлары кайчан кабыначагын төгәл генә әйтә алмыйм”, - дип белдерде.