Рөстәм Миңнеханов Татарстанның күп балалы гаиләләренә дәүләт бүләкләре тапшырды

Рөстәм Миңнеханов сәламләү сүзендә билгеләп үткәнчә, Татарстанда 40 меңгә якын күп балалы гаилә яши. Ел саен өченче һәм аннан соңгы балалар дөньяга килә торган гаиләләр саны арта бара. ТР Президенты ассызыклаганча, бу тенденцияне сакларга кирәк.

«Сезнең кебек гаиләләр ярдәмендә бездә тәрбияле, талантлы һәм акыллы балалар үсә. Без Татарстанның бүгенгесе һәм киләчәгенә ышанабыз. Бу бәйрәм көнендә республиканың һәр гаиләсенә нык сәламәтлек, иминлек, мәхәббәт һәм бәхетле гаилә тормышы телим», — дип мөрәҗәгать итте Рөстәм Миңнеханов чарада катнашучыларга.

Аннары дәүләт бүләкләре тапшыру тантанасы булды. Гаилә институтын ныгытудагы һәм балаларны тәрбияләүдәге казанышлары өчен Балтач районыннан ирле – хатынлы Зыятдиновлар-биш баланың әти-әниләре «Ата-Ана даны» орденына лаек булдылар.

Балаларны тәрбияләүдә һәм гаилә традицияләрен ныгытуда күрсәткән хезмәтләре өчен Апас районыннан Гөлназ Гайнуллина, Кукмара районыннан Сөмбел Гайфетдинова, Баулы районыннан Елена Козлова, Сарман районыннан Ландыш Нуриева, Тәтеш районыннан Наталья Романова, Кукмара районыннан Татьяна Сидорова һәм Азнакай районыннан Гөлнара Фәттахова «Ана даны – Материнская слава» медале белән бүләкләнделәр.