Сукбай этләр ташланмасын дисәгез

Шәһәрнең баш санитар табибы Илгизәр Бариев хуҗасыз хайваннар мәсьәләсен күтәрде. Ул моны халыктан мөрәҗәгатьләр арту белән аңлатты. Сукбай этләр тешләсә, җитди авырулар килеп чыгарга мөмкин. «Котыру – бик куркыныч чир. Шәһәрдә хуҗасыз хайваннарны зарарсызландыру юнәлешендә эшне көчәйтергә кирәк», – диде ул. 
Сүз уңаеннан, бүгенге көндә Чаллыда барлыгы 1501 хуҗасыз хайван тотылган. Аларның 1033е стерильләштереп кире җибәрелгән. «Кызганыч, 20сен саклап калып булмады», – диде Башкарма комитет җитәкчесенең беренче урынбасары Илья Зуев. Ул шәһәр халкын иҗтимагый киңлекләрдә һәм мәгариф учреждениеләре яннарында сукбай этләрне ашатмаска чакырды.
«Бу бәхетсезлек белән тәмамланырга мөмкин», – дип кисәтте җитәкче.