Таксист 32 яшьлек хатын-кызны яулыгы белән буып үтергән

2013 елның июнендә хокук саклау органнарына Бирский районында яшәүче 32 яшьлек хатын-кызның югалуы турында гариза килә. Тикшерү эшләре һәм оператив-эзләү чаралары үткәрелә. Әмма җинаятьченең эзенә төшә алмыйлар. 
2025 елда Оренбург өлкәсендә урнашкан "Кара дельфин" махсус режимлы төзәтү колониясендә гомерлеккә ирегеннән мәхрүм ителүче гаебен таный. Ир-ат хатын-кызның югалуына үзенең катнашы барлыгы турында хәбәр итә. Җинаять эшен тикшерү янәдән торгызыла. 

Тикшерүче-криминалистлар  Бирск шәһәрендәге Агыйдел елгасы ярында, фигурант күрсәтүе буенча, ботаклар белән капланган скелет фрагментларын таба. Үткәрелгән молекуляр-генетик һәм  медицина-криминалистик экспертиза нәтиҗәләре буенча, зыян күрүченең шәхесе һәм үлеменең сәбәбе ачыклана.

Тикшерү ачыклаганча, 2013 елда гаепләнүче таксист булып эшләгән. Бирский районының Емаш авылында аның автомобиленә 32 яшьлек хатын-кыз утырган. Юлда алар сөйләшеп киткән, бергә спиртлы эчемлекләр кулланган. Алар арасында талаш килеп чыккан, ир-ат зыян күрүчене ефәк яулык белән буып үтергән. Ул җинаять эзләрен яшерергә тырышкан. Хатын-кызның гәүдәсен ташу вакытында агым алып китәр дип, елга ярында калдырган.

Ир-ат барлыгы өч кешене үтерүдә гаепләнә. Гомерлеккә ирегеннән мәхрүм ителгән.