Татарча диктант бәйрәме

Беренче көнне акция Татарстанда узды. Урыннарда да, интернеттан да Гомәр Бәшировның затлы «Җидегән чишмә» җырының язылу тарихы турындагы «Чишмә моңы ничек җыр булды?» дигән язмасын әйтеп яздырдылар. Оештыручылар классик әдибебезнең матур эчтәлекле, сүзләре төймә кебек бер-берсенә ялганып тора торган, йөрәгендә татарлык хисләре булган һәркемне дулкынландырырлык язманы сайлаган. Мәктәп укучылары, ата-аналар, пенсионерлар, эшчеләр, хәтта көндәлек эшләрендә татар телен кулланырга да туры килмәгән техник белгечләрнең дә диктант язарга теләк белдерүе дә кадерле. Татар телен саклау, өйрәтүдәге кыенлыклар һәркемгә дә мәгълүм. Тик, күрегез, үзебез теләгән очракта безгә берни дә комачауламый икән!Татарча язуны Рәсәй күләмендә дә күтәреп алдылар, чит илләрдә яшәүче милләттәшләребез дә кушылды. Әлбәттә, алар теләктәшлек итәр, бәлки сагыну-җирсү хисләрен басар өчен дә эшләгәннәрдер моны. Иң мөһиме «Татарча диктант яз!» акциясе аңлы милләттәшләребезне кузгата, туплый алды!