Татарстан урманнарында аномаль эсселек аркасында авиапатрульләр оештырылды

Бу хакта «Татар-информ» агентлыгына биргән интервьюсында ТР урман хуҗалыгы министрының беренче урынбасары Илгизәр Зарипов хәбәр итте.
«Без көн саен урманнардагы хәлләрне күзәтәбез. Һавадан авиапатрульлек һәм җир өсте патрульлеге гамәлгә ашырыла. Температура фонын күзәтәбез, ведомствоара хезмәттәшлек кысаларында ТР Гидрометеорология һәм әйләнә-тирә мохитне күзәтү идарәсеннән якындагы көннәрдә фаразланган мәгълүмат алабыз. Самолетта һөнәри очучы-күзәтүче катнашында очып узабыз. 21 июньдә ул „зур түгәрәк" буенча очып узды. Очыш вакыты алты сәгатьтән артык, маршрут озынлыгы 800 километрдан артык булды», - диде ул.
Урман хуҗалыгы министрлыгы «Авиатор» авиация уку үзәге белән урман фондын авиапатрульләү буенча хезмәт күрсәтүгә контракт төзеде. Авиапатрульләү алдан расланган маршрутлар буенча 1,2 млн гектардан артык мәйданда «Cessna 172» һава судносында үткәрелә. Моннан тыш, республикада 11 мең гектар мәйданда урманнардагы вазгыятьне җир өсте патрульләре күзәтә. 

Фото: vlv-mag.com