Татарстанда агросәнәгать комплексы һәм социаль өлкә хезмәткәрләренең 32 гаиләсе торак шартларын яхшыртачак 

Быел Татарстанда яшәүчеләрнең торак шартларын яхшыртуга авыл территорияләрен комплекслы үстерү программасы буенча 42 миллион сум каралган. Бу 2 мең квадрат метрдан артык торак файдалануга тапшырырга һәм авылда яшәүче 32 гаиләнең торак шартларын яхшыртырга мөмкинлек бирәчәк. Бу хакта журналистларга ТР авыл хуҗалыгы һәм азык-төлек министры урынбасары Марсель Мәхмүтов хәбәр итте.

«Узган ел торак шартларын яхшырту өчен социаль түләүләр өчен 410 миллион сум бүлеп бирелгән иде, бу 21,8 мең квадрат метр торак файдалануга тапшырырга һәм 316 гаиләне торак белән тәэмин итәргә мөмкинлек бирде. Акча АПК хезмәткәрләренә һәм авыл җирендә торак төзү һәм сатып алу өчен социаль өлкәләргә бирелә. Бюджет акчалары хисабына чыгымнарның 70 проценты финанслана, гражданнар акчасы хисабына — 30 процент», — дип сөйләде ул.

Министр урынбасары хәбәр иткәнчә, 2021 елда Татарстан буенча «Авыл территорияләрен комплекслы үстерү» программасын финанслауның гомуми күләме 1,3 миллиард сум тәшкил итә. Программа авыл халкының торак шартларын яхшыртуга, авыл ипотекасына, авыл территорияләрен төзекләндерүгә, транспорт инфраструктурасын үстерүгә һ.б. юнәлдерелгән.

Фото ачык чыганаклардан алынды