Татарстанда медицина хезмәткәрләренә коронавируска каршы прививка ясау ирекле булачак

Татарстанда медицина хезмәткәрләрен «Спутник V» препараты белән вакцинацияләү (ул киләсе атнада башлана) мәҗбүри булмаячак. Роспотребнадзорның Татарстан буенча идарәсе матбугат сәркатибе Миләүшә Җамалиева «Татар-информ»да матбугат конференциясендә шулай дип белдерде.

«Россия Федерациясендә иммунопрофилактика турындагы закон нигезендә, теләсә нинди вакцинация ирекле нигезгә корыла», — дип искәртте Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) белгече.

ТР сәламәтлек саклау министры урынбасары Владимир Жаворонков билгеләп үткәнчә, табибта антитәнчекләр табылган очракта, аңа прививка ясамаячаклар.

«Татар-информ» агентлыгы вакцинациянең эш урыны буенча оештырылачагы, аны поликлиникаларның мобиль төркемнәре үткәрәчәге хакында хәбәр иткән иде.