Татарстанның халык артисты Гөлүсә Җамалиева: "Мин 12 ел ураза тотам"

– Мин 12 ел инде ураза тотам. Бу изге айны ел саен көтеп алабыз. Аллаһка шөкер, улларым Айгиз белән Салават та ислам дине кануннары буенча яшиләр. Икесе дә уразада. Олы улым Айгиз гаиләдә беренче булып, татар-төрек лицеенда укыганда ук, ислам дине кануннары буенча яши башлады. Аллаһка шөкер, аның белән 2014 елда хаҗга да барып кайттык. Абыйсыннан үрнәк алып, Салават та ислам диненә керде. Ул унбер ел, аның 11 яшьлек улы Самир да бер көн дә калдырмый ураза тота. Мөмкинлек булганда бергә җыелып авыз ачабыз, догалар укыйбыз. Рәхәт һәм күңелле. Аллаһ Тәгалә кушканча яшәү рәхәт тә, дөрес тә, җиңел дә. Быел Рамазан ае бик уңайлы вакытка туры килде. Уразаларыбызны барыбызга да җиңел генә тотып бетерергә насыйп булсын иде, - ди Татарстанның халык артисты Гөлүсә Җамалиева.