Түрәләрне интернетта хурлаган өчен җинаять җәзасы кертергә телиләр

Россиядә хакимият вәкилен ачыктан-ачык хурлаган өчен җәзаны катгыйландырырга планлаштыралар. Бу хакта Дәүләт Думасының Иминлек һәм коррупциягә каршы көрәш комитеты башлыгы Василий Пискарев булдырган проектка сылтама белән ТАСС хәбәр итә.

Документ РФ Җинаять кодексының 319 маддәсенә вазифаи бурычларын үтәгәндә яисә аларны үтәүгә бәйле рәвештә хакимият вәкилен ачыктан-ачык хурлаган өчен җаваплылык турында үзгәрешләр кертә.

Яңа нигезләмә буларак интернет яки массакүләм мәгълүмат чараларында түрәләр турында язмалар урнаштыруга кагылышлы җаваплылык турында пункт барлыкка киләчәк. Нигезләмә буенча максималь санкция булып ике елга кадәр иректән мәхрүм итү торырга мөмкин. Җәзалар арасында шулай ук 1 миллион сумга кадәр штраф, мәҗбүри эшләр һәм билгеле бер вазифаларда эшләү хокукыннан мәхрүм итү бар.