Яңа партия вакцина кайта

Чаллыда «Спутник V» вакцинасы запаслары тулысынча файдаланылды. Хакимияттә узган киңәшмәдә шәһәрнең сәламәтлек саклау идарәсе башлыгы Александр Николаев шул хакта хәбәр итте. Бүгенге көндә шәһәрдә препаратның беренче компоненты белән якынча 17 мең кеше, икенче компоненты белән 11 545 кеше прививка ясаткан. Бу атнада Сovid-19дан яңа партия вакцина кайтыр дип көтелә, диде докладчы.

Соңгы мәгълүматлар буенча, Чаллыда пандемия башланганнан бирле яңа коронавирус инфекциясе белән авыруның 2 068 очрагы теркәлгән. Хәзерге вакытта 88 кеше медицина күзәтүендә тора, шуларның 66сы авыруны контактлы юл белән йоктырган.