Популяр җырчы Ильмира Нәгыймова яңа җыр яздырды

Җырчы үзенең социаль челтәрләрендә бу җырны яздырганда авыр хисләргә бирелүе турында әйтте.
«Дуслар, әле дә тынычлана алмыйм, бөтен елыйсыларымны елап бетердем. Бу җырны ничек җырлармын икән… Җырлый алмам, ахры, чыгарырмын гына… Апам турында җыр яздыргач та җырлый алмадым. Энекәшем турындагы җырым махсус операциядә һәлак булган барлык егетләргә багышлана», – ди ул.
Ильмира Нәгыймова күпбалалы гаиләдә үскән. Аның 4 туганы бар иде. Кызганыч, өч туганы вакытсыз арабыздан китте: апасы 25 яшендә фаҗигале төстә, абыйсы 34 яшендә ковидтан вафат булды. 25 яшьлек энесе махсус хәрби операциядә һәлак булды. Җырчы сеңлесе Гөлназ белән икәү генә калды. Гөлназ күптән түгел кияүгә чыкты.