«Дөньядагы куркыныч хәбәрләр дә шом өсти»

Тагын 6 көннән Ураза Гаетен бәйрәм итәчәкбез. «Рамазан аеның тәэсире шундый көчле – дингә генә түгел, кешеләргә, дөньяга караш та үзгәрә. Бу – тыныч, ипле, күңелне йомшарта торган вакыт бит бу», – ди шәһәрдәшебез. 
Гүзәл Фәрхуллина, «Орловский дворик», «Орловская усадьба», «Орловский дворец» рестораннары хуҗасы: 
– Быел ураза тоту миңа авыррак бирелә. Чөнки кызым Таиландка баргач, скутер белән егылып, аягын сындырып кайтты – әле дә дәваланып йөрибез. Танышларымның балалары хәрби операциядә һәлак булды, кайгыларын уртаклашып кайтканнан бирле үземә тынычлык таба алмыйм. Дөньядагы куркыныч хәбәрләр дә шом өсти. Шулай да догалар укып, үз-үземне тынычландырырга, игътибарымны эшкә, хезмәткәрләремә юнәлтергә, җәяү йөрергә тырышам.
Улым белән киленем 16 март көнне сәламәтлекләре чикле балалар һәм аларның әти-әниләре өчен хәйрия ифтары үткәрә – аларга ярдәм итәм. Белдерү биргәч, нибары 4 сәгать үтүгә 100 кунак исемлеге инде әзер иде. Анда тәмле ризыклы табыннан тыш вәгазь дә, кызлар-малайлар өчен уеннар да, бүләк-күчтәнәчләр дә – кыскасы, аларны сөендерерлек сәбәпләр булачак. Аллаһы Тәгалә мондый мөмкинлек биргәненә сөенәм, чөнки ел саен уздыргач, бу ифтарның кайчан булачагын сорап январьда үк шалтырата башладылар.
Минем өчен уразаның хикмәте – ул матур вәгазьләр. Еш кына Тукай районы имам-мөхтәсибе Инсаф хәзрәтне тыңларга туры килә – ул шундый үтемле, мәгънәле итеп сөйли, хәтта ул аңлатканнардан тәннәр чымырдап китә, аннары йөрәгем тынычланып кала. 

Тагы да кызыклырак яңалыклар, фото һәм видеолар «Шәһри Чаллы»ның MAX каналында (язылыгыз).