Чаллы көрәшчеләре «Манзара» спорт премиясе ярышларына бармый

20 январьда Казанның «Пирамида» мәдәни-күңел ачу комплексында «Манзара» спорт һәм музыка премиясе оештырыла. Көрәш ярышында спортчылар өч лигада бил алышачак. Лигалар яшел, көмеш һәм алтынга бүленгән. «Яшел лига» 18 яшькә кадәрге спортчылар өчен, «көмеш лига»да – һәвәскәрләр, «алтын лига»да профессиональ спортчылар, дөнья чемпионатларында һәм Кубокларында катнашучылар, «Манзара» премиясе чемпион билбаулары ияләре көрәшәчәк.

«Алтын лига»да танылган һәм атаклы көрәшчеләр Раил Нургалиев (Теләче), Муса Галләмов (Лаеш), Радик Сәлахов (Лаеш), Рәдис Сәмигуллин (Балтач), Руслан Рәфыйков (Балтач), Каюм Хәйдәров (Казан), Радик Шәймәрданов (Казан), Илнар Галимов (Алабуга), Илдар Шабаев (Ижевск), Андрей Чиндин (Питрәч), Илшат Идиатов (Арча), Айнур Сыртаев (Туймазы), Ринат Дәүләтшин (Кукмара), Руслан Газизуллин (Лаеш), Булат Мусин (Чистай) да булыр дип көтелә. Әлеге ярышларда Чаллыдан Рәнис Гыйләҗетдинов та бил алышырга тиеш иде.

"Бик барасым килгән иде, тик сәламәтлегем какшап китте. Быел «Манзара»га бармыйча калам инде. Әле дә чирләп торам... Тиз арада терелергә исәп, алда – Муса Җәлил турниры", – дип сөйләде безгә чемпион Рәнис Гыйләҗетдинов.

«Манзара» премиясенең төп символик бүләге – чемпион билбавы. Узган елларда абсолют батыр булып Раил Нургалиев, Муса Галләмов, Булат Мусин, Рәнис Гыйләҗетдинов, Элдар Хәмитов, Радик Сәлахов калган иде.