Чаллыда йөк машиналары йөртүчеләр исерек килеш тотылды

Бер төндә Чаллы инспекторлары 5 исерек машина йөртүчене тотты. Шуларның икесе - йөк машиналары йөртүчеләр.

Беренче автомобиль йөртүчене Иске Сарман юлында тоттылар. Йөк ташу буенча кагыйдәләр бозуы ачыкланды. Протокол төзегәндә 47 яшьлек ир-ат үзен шикле тотты. Бите кызарып, сөйләшкәндә тотлыга башлады. Инспекторлар салмыш икәнен аңлап алды. Алкогольгә тикшеренү үтәргә сорадылар. Машина йөртүче баш тартты. 

Икенче исерек шофёрны Казан проспектында туктаттылар. Анысының салмыш икәнлеге махсус аппарат белән дәлилләнде.

Машина йөртүчеләрнең икесенә дә административ протокол төзелде. Аларга 30 мең сумга кадәр штраф һәм ел ярымнан 2 елга кадәр таныклыкларыннан мәхрүм ителү яный. 

Чаллы Автоинспекциясенең пропаганда бүлеге фотолары