Чаллыда Төмәннән һәм Уфадан килүчеләр контракт төзи

Чаллыда Россия Саклану министрлыгы белән контракт төзергә теләүчеләр саны артты. Автокалага илнең башка шәһәрләрендә яшәүчеләр дә килә. Потенциаль хәрбиләр әйтүенчә, республикада контракт төзү өчен шартлар илдә иң яхшылардан берсе.

Бер тапкыр бирелә торган түләүнең күләме июль ахырына кадәр 1,5 миллион сумга кадәр тәшкил итә. Өстәвенә, биредә торак, ашау-эчү белән тәэмин итәләр, бер көн эчендә медицина комиссиясе узарга мөмкин.

39 яшьлек Антон Россия Саклану министрлыгы белән контракт төзү өчен Төмәннән Чаллыга килгән. Аның сүзләренчә, республикада теләсә нинди ярдәм тәкъдим итәләр, медкомиссияне бик тиз узган, чират тормаган. Ул туганнарына өйгә исән-сау әйләнеп кайтырга вәгъдә итте.

«Төп максат – туган илне яклау. Мин махсус автомобильләр заводында эшләдем, ягъни хәрби техника җыйдым, аның ничек эшләнүен үз күзләрем белән күрдем», - диде Антон.

Бенели кушаматлы хәрби дә контракт төзеде. Ул махсус хәрби операциядә катнашкан инде, 2022 елда хезмәт иткән. Ул әлеге карарын үз иленең патриоты һәм аңа тугры булуы белән аңлата. Егеткә 24 яшь кенә булса да, биш медале бар инде. Үзе өчен иң әһәмиятлесен – «Батырлык өчен» медален 2023 елда тапшырганнар.

23 яшьлек Фирусджон да контракт имзаларга карар кылган. Аның сүзләренчә, ул Таҗикстанда туса да, аның гаиләсе шунда ук бирегә күчеп килгән. Ул Россияне туган иле дип саный, ә туган илне сакларга кирәк, ди хәрби. Егет Чаллыга Уфадан килгән.

«Әлбәттә, бу туганнарыма ниндидер финанс мәсьәләләрендә ярдәм итәчәк. Әйтик, әни алган фатирга ипотеканы ябарга», - дип сөйләде ул.

Хәрби комиссариатта хәбәр итүләренчә, Россия армиясе сафларына кушылырга теләүчеләр саны арткан.

«Июль аенда контракт төзергә теләүчеләрнең кисәк артуы күзәтелә. Атнасына 20 кешедән гариза килә. Бу – яхшы тенденция. Егетләр тиешле түләүләрен ала. Татарстан Республикасында түләүләр артты. Алар Идел буе федераль округында иң югарылардан берсе», - дип искәртте хәрби комиссар.

Фото: © Эльмира Гайнетдинова