Резин итек сайлыйбыз

Хәзер сатуда резин итекләрнең ниндиләре генә юк? Төрле төстәгесе, төрле формадагысы, төрле материалдан эшләнгәннәре... Шулар арасыннан үзеңә ошаганын һәм уңайлысын гына сайлап аласы.

Резин итек сайлаучыга киңәшләр:

- Итекнең табанына игътибар итегез. Ул таймаса яхшырак. Шулай ук табаны бөгелә торган булса, умыртка баганасына зыян килмәс.
- Итекнең үзен җентекләп карап чыгарга онытмагыз. Сыдырылган, кабарып торган урыннары булмаска тиеш. Алайса ул бик тиз тишелеп чыгачак.
- Резин итек үзенең формасын яхшы саклый, ягъни ул киңәйми. Аякларыгыз гел җылыда йөрсен өчен калын оекбаш киеп алыгыз.
- Кайбер резин итекләр йон, киез оеклар белән бергә сатыла. Аларны алып киптерергә дә мөмкин.

Шунысы да бар: табиблар резин итекне көненә 3 сәгатьтән дә артыграк киеп йөрмәскә киңәш итә. Чөнки алар һава кертмиләр, нәтиҗәдә аяклар тирли, дымлана. Бу исә гөмбәчек авыруы барлыкка килүгә сәбәпче булып тора.