Швециядә мәчеткә ут төрткәннәр

Швециянең көньягындагы Хессельхольм шәһәрендә билгесез берәү мәчеткә ут төрткән, дип хәбәр итә Төркиянең «Анадолу» агентлыгы Швеция дәүләт радиосына (SR) сылтама ясап.

Нәтиҗәдә, гыйбадәт йортына сизелерлек зыян килгән. Ут белән көрәшүчеләр янгынны тиз арада сүндергән. Хессельхольм Ислам мәдәни ассоциациясе каршында эшләүче мәчеттә берьюлы 200 кеше намаз укый ала. Янгында беркем дә зыян күрмәгән. Полицейскийлар мәчеткә ут төртүчене эзли.