Татарстанда педагогларның һөнәри осталыгын арттыру буенча ике үзәк ачылачак

Татарстанда ел ахырына кадәр «Мәгариф» милли проекты буенча педагогик хезмәткәрләрнең квалификациясен бәяләү һәм һөнәри осталыгын өзлексез күтәрү буенча ике үзәк ачылачак. Бу хакта ТР Мәгариф һәм фән министры Илсур Хадиуллин ТР Дәүләт Советының Мәгариф, мәдәният, фән һәм милли мәсьәләләр комитеты утырышында хәбәр итте.

«Быел Татарстан милли проект буенча грант отты һәм ике үзәк ачабыз. Акчаның гомуми күләме 86 млн. сум тәшкил итә. Федераль бюджеттан субсидияләр мебель, җиһазлар, исәпләү техникасы сатып алуга, программа белән тәэмин итүгә һәм ремонт эшләренә бирелә. Ремонт эшләре һәм җиһазлар белән тәэмин итү төгәлләнеп килә", - дип сөйләде Мәгариф һәм фән министры.

Һадиуллин сүзләренә караганда, педагогларның һөнәри осталыгын һәм квалификациясен бәяләү үзәгенең төп функциясе укытучыларның һәм җитәкчеләрнең квалификациясен бәйсез бәяләү диагностикасы һәм процедурасы, шулай ук һөнәри стандартларга туры килү-килмәүгә комплекслы имтихан үткәрү булачак. «Бездә мондый үзәк юк иде әле. Ул Казанның Авиатөзелеш районында урнашачак", - дип ассызыклады министр.

Ә укытучыларның һөнәри осталыгын өзлексез күтәрү Үзәге Казан федераль университетының структур бүлекчәсе буларак төзелә, дип өстәде докладчы. "Үзәк функциональ грамоталылыкка тупланачак, чөнки PISA–2018 халыкара программасының алынган нәтиҗәләре җентекле анализ таләп итә», — дип ачыклык кертте ул.

Мәгариф һәм фән министрлыгы башлыгы укытучыларның фән һәм методик компетенцияләрен ничек камилләштерергә, математик грамоталылыкны, шулай ук укучылар һәм табигый-фәнни белемнәрне ничек арттырырга кирәклеген уйларга кирәк булачак, дип билгеләп үтте. Нәкъ менә КФУ үзәгендә һөнәри осталыкны арттыру, «горизонталь укыту» моделен кертү, педагогларга шәхси белем бирү маршрутларын төзүдә ярдәм күрсәтү буенча яңа программалар гамәлгә ашырылырга тиеш.