Кешеләр сәерләнә

Банк ишеге төбендә бер ир көннәр буе хәер теләнеп утыра. Башта, жәлләп, учына берничә тапкыр вак акчалар салып киткән идем. Соңыннан ул акчаларга аракы алып эчүен күргәч, күңелем кайтты. Сукбай кебек теләнеп утырса да, торыр урыны да, пенсиясе дә бар икән үзенең. Моны банкта эшләүче кызлар әйтте, чөнки ул пенсиясен шулардан ала икән. 

Гомумән, соңгы вакытта күп кеше сәерләнә башлады кебек тоела миңа. Әллә коронавирус нәтиҗәсе инде... Беркөнне банкка акча алырга дип кергән идем, миннән алда карап торышка яхшы гына кыяфәтле ир керде. Эченнән нидер сөйләнеп, тибенә-тибенә баргач, мин аны сукыр ахрысы дип уйладым. Юк сукыр түгел икән, әмма сау кеше дә түгел. Стенага, урындыкларга тибеп, банк буйлап йөри башлады ул. Берничә талон алды, аннан тагын йөрде-йөрде дә, авыз эченнән нидер сөйләнеп, чыгып китте. 

Зөлфия Галиева.

Фото: https://pixabay.com/