Дамир Фәттахов: "Шатлык" - республика яшьләр үзәге җитәкчеләренең очрашу ноктасы булыр

Үзәктә 2018 елдан башлап этаплап үткәрелгән капиталь ремонт тәмамланды. Ремонт өчен республика бюджетыннан 70,7 млн сум акча бүлеп бирелгән. Капиталь ремонт барышында бинаның фасадын, керү урынын яңарттылар, барлык инженерлык системаларын, тәрәзәләрне алыштырдылар, яңа ишекләр һәм витражлар урнаштырылды. Төзекләндерү эшләре яшьләр үзәге территориясенә дә кагылды. Биредә тротуар плиткасы җәелгән.

Бина эчендә дә шактый үзгәрешләр булды. 180 урынга исәпләнгән “Премьер” залы ремонтланган, сәхнә җиһазлары монтажланган, корылмалар һәм җиһазлар сатып алынган. Дамир Фәттахов учреждениедә яшьләрнең иҗади проектларын гамәлгә ашыру өчен барлык шартлар да тудырылуын билгеләп үтте. “Сәхнә, тавыш, студия бар!”, - диде ул. Яңартылган яшьләр үзәгендә проектлау һәм “Вакыйгалар технологияләре” евент-остаханәсе кебек урыннар барлыкка килде. Музыкантлар өчен Sound Zone булдырылган – бу вокал һәм тавыш яздыру студиясе. Аларның һәркайсында тавыш изоляциясе эшләнгән. Министр Дамир Фәттахов берничә ел музыка мәктәбендә укыган һәм берничә музыка уен коралында уйный белә. Ул осталыгын Чаллы яшьләренә дә күрсәтте. Яшьләр үзәгендә тагын бер заманча зона – “Дуспочмак” кунак бүлмәсе барлыкка килде. Биредә ирекле китапханә оештырылган, китаплар укырга, үзәктә тәрбияләнүчеләрнең видеоклипларын карарга була.  Тавышсыз наушниклар кунак бүлмәсендәгеләргә комачауламаска мөмкинлек бирә. Керү урыны янында коворкинг-зал урнашкан, ул ябык мәйданчыкка чыга. Киләчәктә биредә җәен киносеанслар оештырып булачак. Хореография өчен 3 зал яңартылды.

“Гараж” остаханәсендә телестудия оештырылды. Шулай ук биредә пластинкалы фотозона да бар. Моннан шулай ук граффити белән декорацияләнгән ябык мәйданчыкка чыгарга мөмкин. “Шатлык" яшьләр үзәгендә “Яр-Че” кофейнясы барлыкка килде. Аның өчен аерым керү урыны булдырылган. Дамир Фәттахов капиталь ремонт нәтиҗәләрен югары бәяләде һәм тиздән республика яшьләр үзәкләре җитәкчеләренең “Шатлык”та күчмә очрашуын үткәрергә тәкъдим итте.

Зөлфия Галим