Шамил Усманов урамында төзекләндерү эшләре дәвам итәчәк

Чаллының Шамил Усманов урамында юл яңарту эшләрен дәвам итү өчен республика бюджетыннан 2 миллион сум акча бүлеп биреләчәк. Сүз Халыклар Дуслыгы проспектыннан башлап Академик Королев урамына кадәрге участок хакында бара. Аны 4 полосалы итеп эшләячәкләр. Шулай ук биредә тукталышлар урнаштыру һәм яңгыр коелары булдыру да күздә тотыла. Проект-смета эшләре җәй уртасына әзер булырга тиеш. 
Исегезгә төшерәбез,  узган ел Шамил Усманов урамының Хәсән Туфан һәм Халыклар Дуслыгы проспектлары арасындагы өлеше яңартылган иде. Биредә “Шәһәр автомобиль юллары» предприятиесе эшчеләре барлыгы 99,7 миллион сумга төзекләндерү эшләре башкарды. Әлеге урамны ремонтлау этаплап алып барыла, биредә эшләр  2017 елда башланды.