Чаллы мәдрәсәсе шәкертләренә мобилизациядән кичектеререлү биреләме?

5 октябрьдә Россия Президенты Владимир Путин мобилизациядән кичектерү турында указны имзалаган иде. Аның нигезендә, хәрби операциядән азат ителүче гражданнар исемлегенә дини белем бирү учреждениеләрендә белем алучылар, ягъни шәкертләр дә кертелде. Чаллы мәдрәсәләрендә белем алучылар да мондый хокуктан файдалана аламы? Әлеге сорауга ачыклык кертү максатыннан, без “Ак мәчет” мәдрәсәсе директоры Рөстәм хәзрәт Шәйхевәлиев белән элемтәгә кердек. 

“Безгә әлегә бу хакта аерым бер сүз дә әйтүче булмады. Көндезге бүлектә укучы мәдрәсә шәкертләре алар, дөрестән дә, армия хезмәтеннән кичектерелеп торалар. Бу указ, минемчә, әлеге канунны ныгытыр гына дип уйлыйм”, - диде дин әһеле.

Бүгенге көндә “Ак мәчет” мәдрәсәсенең көндезге бүлегендә 27 шәкерт белем ала. Укулар 1 сентябрьдә башланган. Рөстәм Шәйхевәлиев белдерүенчә, кабул итү комиссиясе инде күптән үз эшен тәмамлаган һәм өстәмә рәвештә беркемне дә укырга алмаячаклар.