Алты яшькә кадәр баласы булган эшсез аналар өчен укыту курслары оештырыла

Алты яшькә кадәр баласы булган һәм беркая эшләмәгән аналар өчен уку-өйрәнү, квалификация күтәрү курслары оештырыла. Бу хакта «Татар-информ» агентлыгында матбугат конференциясендә республиканың хезмәт, халыкны эш белән тәэмин итү һәм социаль яклау министры Эльмира Зарипова әйтте.

«Быелдан яңалык кертелә. Хәзер декрет ялындагы хатын-кызлар гына түгел, алты яшькә кадәр баласы булган, беркая эшләмәүче, эш эзләп, мәшгульлек үзәкләренә мөрәҗәгать иткән аналар да яңадан берәр һөнәргә укытылачак», — диде министр.

Республиканың балалы хатын-кызларны мондый укыту тәҗрибәсе бар инде. 2011-2019 елларда Татарстан бюджеты акчалары хисабына 10,1 меңнән артык хатын – кыз белем алды. Укулар «Демография»милли проекты кысаларында оештырыла. Милли проектлар Россиядә 2019 ел башыннан бирле Президен Владимир Путин кушуы буенча гамәлгә ашырыла.