Чаллыда автобус пассажирны өстерәп барган

Чаллы судында игътибарсыз автобус йөртүче эше каралды. Узган ел «Райисполком» тукталышында чак кына пассажир гомере өзелмәде.

Автобус тукталышка килеп туктый. Пассажирлар чыгып беткәч, шофёр ишекләрне ябып юлга кузгала. Бу вакытта ишеккә бер пассажирның җилкәсенә асылган сумкасы кысылып калган була. Автобус аны өстерәп алып китә. Пассажирның иңбаш һәм уң бот сөякләре сына. 

Шуңа да карамастан зыян күргән шәһәрдәш шофёрны гафу итә һәм җинаять эшен туктатуны сорый. Моны һәм автобус йөртүченең хөкем ителмәвен исәпкә алып, суд эшне туктатты.