Чаллыда балалар бакчасына йөртүчеләр хәрбиләргә гуманитар ярдәм җибәрделәр

Чаллының 117нче «Уенчык» балалар бакчасы хәйрия чараларында актив катнаша. Биредә тәрбиячеләр, ата-аналар, волонтерлар һәм балалар – барсы бергә махсус хәрби операциядәге егетләргә гуманитар ярдәм җыялар.
Иреклеләр эшчәнлеге – Россия Президенты Владимир Путин тәкъдиме белән тормышка ашырыла торган «Яшьләр һәм балалар» милли проектының бер юнәлеше. 
«Уенчык» коллективы тырышлыгы белән хәрби техникага резина сатып алынды һәм башка кирәк-яраклар җыелды. Балалар махсус хәрби операция зонасындагы егетләргә 23 февральгә рәсемнәр ясадылар, рәхмәт һәм мәхәббәт белән сугарылган хатлар яздылар.
Җыелган ярдәмне СВО ветераннары шәһәр Советы ассоциациясе рәисе урынбасары Тимур Нусратовка тапшырдылар. 
Фотолар шәһәр хакимияте сайтыннан алынды.