Чаллыда җылы бирү вакыты билгеле

Бу атна башында Чаллыда балалар бакчалары һәм стационар сәламәтлек саклау учреждениеләренә җылылык бирелә башлый.
Дүшәмбе киңәшмәсендә шәһәр мэры Наил Мәһдиев шундый күрсәтмә бирде. 

Әлегә һава торышы яхшы тора.

«Бу атнада һава торышы 12-15 градус җылы була. Шулай да балалалар салкын балалар бакчасына килергә тиеш түгел. Бу аларның сәламәтлегенә тискәре йогынты ясарга мөмкин. Шулай ук хастаханәләрдәге авыруларга да җылы кирәк. Шуңа күрә бу учреждениеләргә беренче чиратта җылы биреләчәк», – диде мэр.  

Аннары мәктәпләр һәм торак йортларга җылы биреләчәк.

«Барсы да һава торышына бәйле. Әмма бөтен объектлар җылыту сезонын башаларга әзер булырга тиеш», – дип кисәтте мэр.