Чаллыда Джефф Монсон имзасы белән бокс перчаткалары уйнатачаклар

29 сентябрьда Чаллының Боз сараенда бокс буенча зур турнир оештырыла. Рингта Россия командасы Таҗикстан боксчылары белән очрашачак. Бу хакта матбугат конференциясендә хәбәр иттеләр.

Барлыгы 7 турнир булачак. Рингта Кевин Джонсон белән Джейсон Гаверн да сугышачак. Алар икесе дә Американың танылган боксчылары (бу хакта монда язган идек). Турнирның махсус кунагы - Джефф Монсон. 

"Чаллыга "Снеговик" Джефф Монсонның килүе – зур вакыйга. Ул республикада бушлай грэпплинг, ММА клублары ача. Турнир көнне хәйрия аукционы оештырачакбыз. Джефф Монсон имзасы белән бокс перчаткалары уйнатачакбыз. Акча Чаллы егете тернәкләнүенә тотылачак", - дип сөйләде турнир оештыручы һәм катнаш көрәш Федерациясе президенты Андрей Самцов.