Чаллыда мәрхүмнәр белән хушлашу йорты булачак

Мәрхүмнәр белән хушлашу бинасы проекты әзер. Төзеләчәк урыны да билгеле. Ул Комаров урамында, БСМП һәм морг янында урнашачак. Бу хакта матбугат конференциясендә башкарма комитет җитәкчесе Фәрид Сәлахов сөйләде.

Хушлашу йорты бер катлы булачак. Патологоанатом бүлеге белән тоташачак. 

-    Ике зал ясау күздә тотыла. Мәрхүмнең туганнары һәм чишенү бүлмәсе, бәдрәф булачак. Шулай ук ЗАГС, МФЦ хезмәткәрләре, җирләү мәсьәләләре белән шөгыльләнүче белгечләр дә шунда утырачак. Мәрхүмнең туганнарына документларны бер җирдә генә тапшырачаклар, - дип сөйләде Фәрид Сәлахов. 

Хушлашу йорты гомуми мәйданы 1130 квадрат метр булачак. Бәясе 97 миллион сумга бәяләнә.