Чаллыда хатын-кыз фатирында 6 Әзербайҗан кешесен яшәткән

Хокук сакчылары Чаллыга килеп төпләнгән мигрантларны тикшерә. Бер көн эчендә генә алар 20гә якын кагыйдә бозуга тап булды. Мигрантлар Россиядә тору, медицина тикшерүе үтү, мәҗбүри дактилоскопик теркәлү, миграция белән бәйле кагыйдәләрне бозганнар. Таҗикстан, Үзбәкстан, Төркмәнстан, Әрмәнстан һәм Әзербайҗан илләреннән килгән 20-42 яшьлек 19 ир-атка штраф салынды. Төркмәнстаннан килгәне мәҗбүри рәвештә туган иленә җибәреләчәк. 

Полиция хезмәткәрләре чит ил кешеләрен законсыз рәвештә фатирларында яшәтүчеләргә дә тиешле чаралар күрде. Шәһәрдәшнең берсе фатирында 6 Әзербайҗан кешесен яшәткән. Аңа 3 мең сум штраф салынды.