Чаллыга эшкә килүче табибларга 500 мең сум бирәчәкләр

Чаллыга эшкә килүче табибларга шәһәр хакимияте 500 мең сум бирәчәк. Моңарчы ул 200 мең сумны тәшкил итә иде. Социаль ипотекага фатир алуга республикадан 800 мең сум бирелә.

"Элегрәк без 100 мең сум бирә идек. Соңыннан 200 мең сумга күтәрдек. Бу юлы  уйлаштык та 500 мең сумлык акчалата ярдәм бирергә булдык", - диде мэр.

Чаллыда сәламәтлек саклау идарәсенең 2024 ел нәтиҗәләре буенча медицина советының киңәйтелгән утырышы узды. Анда ТР сәламәтлек саклау министры Марсель Миңнуллин, шәһәр мэры Наил Мәһдиев, сәламәтлек саклау идарәсе җитәкчесе Рөстәм Ногманов, шәһәрнең дәвалау учреждениеләренең баш табиблары һәм медицина хезмәткәрләре катнашты.