Чаллыда Үзбәкстан гражданины батып үлгән

Кичә Мәләкәс елгасында (Кыңгыраулы күпер янында) бер кеше батып үлгән. Коткаручылар: «Ир күпердән суга сикерде һәм йөзеп чыкмады» – дигән хәбәр алгач, урынга баралар.

Батучыны ярдан 10 метр ераклыкта 2 метр тирәнлектән табып алалар. Ул 34 яшьлек Үзбәкстан гражданины булып чыга.

Коткаручылар да, табиблар да күпердән суга сикерүнең куркыныч икәнен искәртәләр. «Суга сикерү нәтиҗәсендә умыртка баганасының муен бүлеге зарарлана, чөнки кеше суга, ташка  бәрелә... Суның тирәнлеген чамалап бетерми. Күпердән сикергән кешеләрнең 70%ы исән калмый. Исән калганнары исә инвалид була», – ди 4нче шифаханә табибы Гөлсәрия Абдуллина.

Зөлфия Исләйле.