Көрәшкә кил - бүләк от!

Көрәш ярышларында җан атучылар да кыйммәтле бүләк ота ала. 15-17 январьда Чаллының «Витязь» спорт комплексында «Татарстан яшьләре» газетасы призларына көрәш буенча Татарстан беренчелеге узачак. Ярышларда 2007-2008нче елгы яшүсмерләр бил алышачак. Баш хөкемдар - Чаллы көрәш федерациясенең башкарма директоры Рамил Хисмәтуллин.

Көрәш ярышларында республикадан җыелган иң көчле спортчылар катнашачак. 16да январьда сәгать 9да башлана. Тантаналы ачылыш шул ук көнне сәгать 11гә билгеләнгән. Шунысы мөһим: оештыручылар ярышларда призлы урыннар алган спортчыларга гына түгел, ә җанатарларга да саллы бүләкләр әзерләгән. Алар арасында телевизорлар, тузан суырткычлар, чәйнек-феннар да бар.