Иң көчле көрәшчегә күпме акча бирәчәкләр?

Муса Җәлил истәлегенә «Ватаным Татарстан» газетасы гамәлгә куйган ачык турнир 13-15 февраль көннәрендә Казанның «Ак барс» көрәш сараенда уза. 62нче тапкыр үткәрелүче ярышта 44 командадан барысы бергә 380 көрәшче катнаша.

«Бәйгедә көрәшчеләрне зур бүләкләр көтә. Беренче урынга – 100 мең, икенчегә – 70 һәм 2 өченче урынга 50шәр мең сум акчалата бүләк каралган», – дип искәртте ачылыш тантанасында спорт министры урынбасары Хәлил Шәйхетдинов.

Шулай ук турнирда Ильяс Галимов исемендәге махсус премия дә тапшырылачак. Әлеге бүләк 30 мең күләмендә турнирның финал алышларында иң матур алым күрсәткән көрәшчегә биреләчәк.

Премия 2020 елда вафат булган танылган көрәшче Ильяс Галимов истәлегенә булдырылды.

Сүз уңаенда, соңгы елларда көрәштә хөкем итүнең гадел булу-булмавы турында сүзләр еш ишетелә. Халыкара категорияле хөкемдар, Чаллы шәһәре көрәш федерациясе башкарма директоры Рамил Хисмәтуллин, талаш-сугышларга нокта куелды, дип белдерә.

"Соңгы ярты елда гына да Татарстанның барлык районнарыннан килгән хөкемдарлар катнашында 10нан артык семинар узды. Укыдык, көрәш кагыйдәләрен сөйләштек, берникадәр үзгәрешләр керттек. Яңа кагыйдәләр кертелгәннән бирле дүрт ярыш уздырдык. Әйтергә кирәк, талаш-сугышлар кимеде, тренерлар арасында да, көрәшчеләр арасында да хөкемдарларга тел-теш тидерүчеләр булмас дигән өметтә калабыз. Без беребез дә читтән килгән кешеләр түгел, үзебез дә көрәшеп үскән егетләр. Берсе дә уйлап чыгарылган кагыйдәләр түгел. Шөкер, хөкемдарлыкта да үсеш-үзгәрешләр булып тора, көрәшчеләребезнең дә көче арта. Татарча көрәш үзе дә үсә, үзгәрә", - ди Рамил Хисмәтуллин.

Муса Җәлил истәлегенә турнирның ачылыш тантанасында иң яхшы көрәшчеләрне дә, аларны әзерләгән тренерларны да, хөкемдарлар, журналистларны да бүләкләделәр. Өлкәннәр белән эшләүче иң яхшы тренерлар арасында Чаллыдан Илнур Хәйбуллин да бар иде. Шулай ук яшьләр белән эшләүчеләр арасыннан Чаллыдан атаклы тренер Илгиз Шәмсевәлиевны да келәм түренә чакырып котладылар. 

Тагын бер мөһим яңалык турында Рамил Хисмәтуллин хәбәр итте. Чаллының 400 еллыгы уңаеннан шәһәр командасы вәкилләре спорт министры урынбасары Хәлил Шәйхетдиновтан 2026нчы елда Муса Җәлил истәлегенә оештырылачак турнирны автокалада уздырырга сораган.

"Җәлил турниры шәһәр юбилее уңаеннан узачак чаралар планына кертелгән, киләсе елда ул Чаллыда узачак", – дип җаваплады Хәлил Шәйхетдинов.

15 февральгә көрәш расписаниесе:

08.30 – судьялар корпусы киңәшмәсе

09.00 – барлык авырлык категорияләрендә ярышларны дәвам итү

10.30-11.30 – ярымфинал һәм финал көрәшләре

1.30-12.00 – ярышларда җиңүчеләрне һәм призерларны бүләкләү

"Шәһри Чаллы" белән калыгыз. Җиңүчеләр һәм җиңүче командалар турында аерым язып үтәрбез.