ЮХИДИ инспекторлары ерак сәфәрләргә чыкмаска куша

Республика Дәүләт автоинспекциясе Татарстан халкын юлда сак булырга һәм аномаль салкыннар булганда ерак сәфәрләргә чыкмаска өнди. Синоптиклар фаразлавынча, 7-10 гыйнвар көннәрендә төннәрен температура -37 градуска кадәр төшәргә мөмкин. Көндезләрен исә -23... -28 градуска кадәр суытачак.

Мондый көннәрдә машина йөртүчеләргә юлга чыгар алдыннан автомобильләрен җентекләп тикшерергә кирәк. Аеруча, дизель ягулыгында эшли торган техника белән проблемлар килеп чыгарга мөмкин. Чөнки әлеге ягулык салкынга чыдам түгел һәм тиз куера.

Көтелмәгән хәлләр булган очракта, Дәүләт автоинспекциясенә 8(843)5-333-888 телефоны аша мөрәҗәгать итәргә мөмкин.