Күренекле артист театрдан китә

«Мастеровые» рус драма театрының әйдәп баручы артистларының берсе – Алексей Ухов тамашачыларына күңелсез хәбәр җиткерде. Ул театрдан китәргә карар кылган.

– Миңа биредә кысан була башлады. Театр сәясәте белән фикерләрем туры килми башлады. Театрда иҗади һәм рухи климат үзгәрде. Иҗади лидер югалды. Тагын бик күп килешмәгән әйберләр бар. Бу хәлдән чыгуның бердәнбер юл – китү. Театрдан кая барасымны белмичә китү өчен бу сезонда кыюлык һәм ышаныч  тупладым. Хәзер миндә шик һәм курку хисе көчле, шул ук вакытта илһам һәм азарт бар. Миңа 30 яшь. Тормыш башлана гына», – дип язган ул үзенең социаль челтәрендә.

Алексей Ухов – Казан театраль училищесын тәмамлап, «Драма театры артисты» белгечлеге алды. Театрда 9 ел эшләү дәверендә берсеннән-берсе уңышлы образлар тудырды. «Дикарь» спектаклендә баш роль белән башланган иҗат юлында 30лап спектакльдә уйнады. Ул тамашачыларның яраткан артистлары исемлегендә. 

Фото: «Мастеровые» театрыннан алынды