Махсус хәрби операциядә катнашучы Чаллы хәрбиенең беренче баласы туды

Махсус хәрби операциядә катнашучы хәрби Замирның беренче баласы – кызы туды. Ялга кайткан яшь әти хатыны белән кызын бала тудыру йортыннан каршы алу тантанасында катнашты. 

Замир белән Алсу кызларына Афелия дип исем кушканнар. 

Гаиләне шатлыклы вакыйга белән котларга туганнары,  әти-әниләре, җитәкчеләр килгән иде. Башкарма комитет җитәкчесе Фәрит Сәлахов шәһәр мэры исеменнән гаиләне сабыйлары туу белән котлап, 100 мең сум акча һәм бала туу таныклыгы тапшырды. 

«Көз көне «Энергетик» мәдәният сарае яныннан сезне озатканда, гаиләләрегезгә ярдәм итәрбез дип ышандырган идек. Без сүзебездә торабыз, махсус хәрби операциядә катнашучыларның гаиләләренә даими булышабыз, бу эш киләчәктә дә дәвам итәчәк», – диде Фәрит Сәлахов. 
 

фотолар /шәһәр сайтыннан алынды