Шарда экскурсияләр тыелды

Кама транспорт прокуратурасы һава транспортын имин эксплуатацияләү өлкәсендә законнар үтәлешен тикшерә. Интернет челтәре мониторингы барышында Яр Чаллы һәм Әлмәт шәһәрләре өстендәге һава шарында (аэростатта) очышлар - түләүле экскурсия хезмәтләре күрсәтү турында реклама белдерүенә юлыгалар.  Прокуратура аэростат хуҗасының очышларны уздыру өчен эксплуатант сертификаты булмавын ачыклаган. Бу кулланучылар тормышы һәм сәламәтлеге өчен куркыныч. Тикшерү нәтиҗәсендә эшмәкәр административ җаваплылыкка тартылган, хезмәт күрсәтү турындагы игълан интернеттан алынган.