Чаллы мэры шартлау булган 38/15 йортын килеп карады

Шартлау булган 38/15 йортына бүген Чаллы мэры Наил Мәһдиев килде. Ул фаҗига булган 10нчы каттагы фатирга менеп, аны карап чыкты. 

“Шартлау шактый көчле булган. Аның дулкыны белән ишек-тәрәзәләр чыгып очкан. Аларны һичшиксез алыштырырга кирәк булачак. Тулы экспертиза үткәреп, тиз арада ремонт эшләренә керешәчәкбез. Шартлау аркасында зыян күргән 10нчы катта яшәүчеләрнең барысына да ярдәм күрсәтеләчәк”, - диде мэр.

Мәгълүм булганча, хуҗалары бу фатирны 21 яшьлек егеткә вакытлыча файдалануга (съём) биргән булган. Ир-ат Тукай районыннан килеп, шәһәр предприятиеләренең берсендә эшләгән. Хезмәт урынында яхшы исәптә торган, аена якынча 60 мең сум акча алып барган. 

Фаҗига булыр алдыннан ул абыйсына үз-үзенә кул салырга теләве хакында сөйләгән. Фаразлар буенча, шартлатасы петарданы ул почта аша кайтарткан. (Бу хакта монда яздык).

Шәһәр мэры Наил Мәһдиев та: "Әлегә бу фаҗига суицид очрагы буларак карала. Тулы һәм төгәл җавапны безгә барлык тикшерү чаралары үткәрелгәннән соң хокук сакчылары бирәчәк”, - дип белдерде.

Шунысы да мәгълүм: кичәге шартлау нәтиҗәсендә 38/15 йортының лифтлары да эштән чыккан, ишекләре җимерелгән. Хезмәт күрсәтүче предприятие вәкиле әйтүенчә, иртәгә иртәнгә ул эшли башлаячак. Бүген 16 катлы йортта яшәүчеләр җәяү йөрергә мәҗбүр.