Тукай районы балалар бакчасында проблема хәл ителерме?

Тукай районы судында Иске Җирекле авылының «Тургай» балалар бакчасы буенча эш каралды. 2023 елда тикшерү вакытында бакчада җитди хокук бозулар – чистартылмаган вентиляция камералары, түбәнең агач конструкцияләре уттан сакланмавы, азык-төлек блогында эшләми торган суырткыч һәм кер юу бүлмәсендә җиһазландырылмаган вентиляция – ачыкланган. Прокурор җитешсезлекләрне бетерүне район башкарма комитетына йөкләгән. Тик проблема бүгенге көнгәчә хәл ителмәгән. Тукай районы прокуроры судка мөрәҗәгать итте.

Дәгъва канәгатьләндерелде. Бакчада ачыкланган проблемаларны район башкарма комитеты хәл итәргә тиеш. Суд карары әлегә законлы көченә кермәде. Прокуратура хокук бозуларны бетерүне контрольдә тота.