1 декабрьгә кадәр салымнарыгызны түләгез!

Шәһәребездә бүгенге көндә салымнарның нибары 251 млн. сумы ягъни 30% ы гына түләнгән. Бу хакта салым инспекциясе җитәкчесе Лилия Гатина хәбәр итә. Барлыгы әлегә 164 млн. сум транспорт салымы, 72- милек һәм нибары 15 млн. сум җир өчен салым түләнгән. Лилия Гатина сүзләренә караганда, узган ел бу вакытта 34% түләнгән булган. Әллә ни зур аерма юк, ләкин бөтен салымнарны да 1 декабрьгә кадәр түләп бетерү мөһим. Ягъни, күрсәтелгән вакытта, шәһәр казнасындагы акча күләме 830 млн. сумга артырга тиеш.