Чаллының Гостев урамында күпер төзелә

автор, 16 сентябрь 2021 - 07:56

553

Чаллыда Гостев урамында автомобиль юлы төзекләндерелә һәм күпер төзелә. Бүгенге көндә эшләр 13-14 процентка башкарылган. Эш барышы белән шәһәр мэры Наил Мәһдиев тә танышты.

Эшләрне «РБР-16» подряд оешмасы алып бара. Директор Таһир Сөнгәтуллин сүзләренчә, алар 17 августта эшкә керешкәннәр. Бу вакыт эчендә ике фундамент, ике терәк баганасы урнаштырылган, хәзер өченчесен куячаклар.
Эшләр ел әйләнәсендә алып барылачак.
– Бүгенге көндә объектта 50 кеше хезмәт куя. Пик вакытында алар саны 100гә кадәр җитәчәк. Контракт буенча эшләрне 2022 елның октябренә тәмамларга планлаштырабыз, – диде директор.
Төзелеш вакытында гамәлдәге машиналар йөрү юлы ябылачак. Чөнки Мәләкәс аръягы һәм ГЭС бистәсе ягыннан эре чистарту корылмалары төзү планлаштырыла, аларга күпердән генә түгел, якын-тирәдәге яңгыр сулары да агачак.
Контракт суммасы 1 миллиард 86 млн сум тәшкил итә. Әлегә шуларның 170 миллионы тотылган.

Зөһрә Вәлитова.