Коронавирус чигенә

Баш табиб Резеда Мавзютова әйтүенчә, 2021 елда госпиталь стационарында ковид һәм үпкә ялкынсынуы белән чирләгән 1182 кеше дәваланып чыккан. Замана афәте йоктырган авыруларны дәвалауга – 27 табиб, 80 шәфкать туташы, 34 кече персонал үзеннән зур өлеш керткән. Стационар 100 кешегә исәпләнгән вакытлыча йогышлы авырулар госпитале булып эшләде. Биредә авырулар өчен көн саен бер тоннадан артык кислород кулланылды.
– Без вакцина ясату нәтиҗәсендә коронавирус белән авыручыларның саны кимүгә сөенәбез, чөнки бу безгә гадәти режимга күчәргә мөмкинлек бирде. Госпиталь коллективының  фидакарь хезмәте хөрмәткә лаек. Ә шәһәрдәшләргә тынычланырга иртәрәк икәнлеген искәртәм. Яңа ел бәйрәмнәрендә саклык чараларын үтәгез, бәйрәмне гаиләләрдә генә үткәрегез, – ди Резеда Ришатовна.
Хәзерге вакытта госпиталь стационарында профилактика чаралары үткәрелә.  Бина, җиһазлар, җилләтү системалары санитар-эпидемилогик таләпләр буенча зарарсызландырыла.  Бу эшләр тәмамлангач авыруларны кабул итә башлыйлар. Госпитальдә коронавирус инфекциясеннән соң авыруларны тернәкләндерү дәвам итә. 2020 елның июленнән COVID-19 белән чирләгән 1688,  ә 2021 елда 1041 кеше  биредә үзенең сәламәтлеген ныгыткан. 
Исегезгә төшерәбез, шушы көннәрдә генә 1/09 адресы буенча урнашкан 5нче шәһәр хастаханәсеннән дә ковид-чикләүне алганнар иде.