5 елда Чаллыда юллар ремонтлауга 9,7 млрд сум акча тотылды

Соңгы 5 елда Чаллыда юллар ремонтлауга 9,7 млрд сум акча тотылды. 2025 елда бу максатларга 4,5 млрд сум акча бүлеп бирелде. Бу хакта дүшәмбе киңәшмәсендә шәһәр хуҗалыгы һәм тормышны тәэмин итү идарәсе башлыгы Руслан Вильданов хәбәр итте. 
2025 елда Чаллы белән Тукай районын тоташтыручы Боровецк күпере, Яшьлек проспекты капиталь ремонтланды. Бу –  шәһәрнең 400, беренче КАМАЗ йөк машинасы чыгуга 50 ел тулуга зур бүләк. 

«Күперне һәм проспектны реконструкцияләү нәтиҗәсендә куркынычсызлык һәм хәрәкәт уңайлыгы артты. Юллар киңәйде, заманча җәяүлеләр юллары, отбойниклар барлыкка  килде. Болар әлеге участокта юл-транспорт һәлакәтләрен киметүгә китерде», – диде Руслан Вильданов.

Моннан тыш, Орлов боҗрасыннан КАМАЗ проспектына кадәр Машинатөзүчеләр урамы, Магистральная, Орловский, маршал Жуков урамы капиталь ремонтланды. Эре объектлар белән бергә инфрастурктура проектлары да яңартылды: юл билгеләре, сәнәгать-коммуналь зоналарга, социаль әһәмияткә ия объектларга  керү юллары, шәхси сектордагы юллар да тәртипкә китерелде. «Прибрежный» бакчачылык ширкәтенә керү юлы капиталь ремонтланды.