Чаллыда ришвәт алучы җитәкчене хөкем иттеләр

Шәһәр судында Чаллы тимер юллар станциясенең элекке җитәкчесе Алмаз Ханов эше каралды. Ул ришвәт алуда гаепләнә. Аны 3 эпизод буенча хөкем иттеләр. Бу хакта Чаллы судының матбугат хезмәте хәбәр итә.

2016 елда Алмаз Ханов вагон һәм контейнерларны юу буенча ялган актларга кул куя. Акчалар кассага бармый - кесәсенә. Һәрбер вагон өчен ул 2 мең сум ала. Нәтиҗәдә 200 мең сумнан артык акча үзләштерә. 

Экс-җитәкче судта үз гаебен танымады. Аны шартлы рәвештә 3 елга ирегеннән мәхрүм иттеләр. 2 ел төзәтү эшләре билгеләнде.