Акча нинди кешеләрне ярата?

Кемнең генә бай буласы килми икән? Берәүләр җиңел юллар эзли, берәүләр көн-төн эшләп тир түгә, ә кемнәрдер сынамышларга ышанып, акчалы булырга тырыша. Әйе, акча җәлеп итү буенча сынамышлар күп. Борынгыдан килгән бу ышануларның, бәлки, чынлап та нәтиҗәсе бардыр?

Сынамышларга ышансак, акча зарланучыларны яратмый икән. “Акча юк!” – дип күп кабатлаучылардан акчалар качарга тырыша икән. Шуңа күрә зарланмагыз, “Яшәргә җитә!” – диегез.

Акчаны кулдан-кулга бирергә ярамый, диләр. Начар энергетика күчәргә мөмкин икән. Акчаны уң кул белән бирергә, сул кул белән алырга кирәк, дигән сынамыш та бар.

Өйдә һәрвакыт акча булсын өчен тишелгән кием кимәгез, ә краннардан су тамып тормасын. Кесәдә берәр тимер акча йөртегез, ул байлык теләп торачак.

Бурычка алган акчаны кич кайтармагыз, кич бирмәгез дә.

Юлда, юл чатында яткан акчаны алырга ярамый, ди. Кемдер тормыштагы негативыннан котылырга теләп, аны ташлаган булырга мөмкин.

Акча сызгыручыларны яратмый, шуны да онытмагыз. Ул тынычлык ярата!