Баланы дәүләт порталы аша 1 сыйныфка язып була

1 апрельдән «Дәүләт хезмәтләре» порталында беренче сыйныфка гаризалар кабул итү башлана. Булачак беренче сыйныф укучыларының ата-аналары документлар тапшыруга алдан әзерләнә ала - 17 марттан гаризаның караламасын булдыру мөмкинлеге бар, дип хәбәр ителә национальныепроекты.рф сайтында.

Мондый функция барлык кирәкле мәгълүматларны алдан тутырырга һәм кабул итү кампаниясе башланган көнне гариза җибәрергә мөмкинлек бирә. Шул ук вакытта, мәгълүматның күп өлеше кулланучының шәхси кабинетыннан автомат рәвештә куела.

Гаризалар кабул итү ике этапта узачак. 1 апрельдән 30 июньгә кадәр документлар мәктәпләрдә (бала теркәлгән урын буенча), шулай ук ташламалардан файдаланучы гаиләләрдән кабул ителәчәк. 6 июльдән 5 сентябрьгә кадәр беркетелгән территориядә яшәмәгән балаларның ата-аналары, буш урыннары булган очракта, гариза тапшыра алачак.

Порталда мәктәпне сайларга, ташламаларны һәм укыту параметрларын күрсәтергә мөмкин. Караламаны тутырганнан соң кулланучы гаризаны тапшыру башланганчы кирегә исәпләү таймерыннан файдалана ала, ә кампания башланырга бер көн кала бу хакта искәртү килә.

Узган ел нәтиҗәләре буенча «Дәүләт хезмәтләре» порталы аша беренче сыйныфка 1,1 миллион гариза тапшырылган, бу 2024 ел белән чагыштырганда 13 процентка күбрәк.

Татартанда «Яшьләр һәм балалар» илкүләм проекты гамәлгә ашырыла.