Бер атна эчендә 70 кеше талпаннан зыян күрде

Чаллыда талпаннан зыян күрүчеләр саны кимеми. Бер атна эчендә Чаллыда 70 кеше хастаханәгә мөрәҗәгать иткән. Аларның 21е – балалар. 

“Зыян күргән шәһәрдәшләрнең күбесе, 42 кеше, ерткыч бөҗәкне шәһәрдән читтә эләктергән. 13 кеше урманнан алып кайтса, калганнары – бакчаларыннан”, - ди Роспотребнадзор идарәсенең Чаллы бүлеге баш белгече-эксперты Ромил Аксаков. 

Талпаннарның хәзер актив чоры. Алар кеше сәламәтлегенә җитди зыян салырга мөмкин. Талпаннар тараткан барлык инфекцияләр арасында кеше өчен хәвефле җиде инфекция бар: энцефалит, боррелиоз, эрлихиоз, талпанның кире кайту тифы, туляремия, бабезиоз һәм таплы бизгәк. Бу авыруларның барысын да бер билге берләштерә – алар үзәк нерв системасына зыян сала, инвалидлыкка, хәтта үлемгә китерергә мөмкин. Шуңа белгечләр алдан куркынычсызлык чараларын күрергә киңәш итә. 

Урман, парк, бакчаларда йөргәндә каплаулы өс-киеме кияргә, репеллентлар кулланырга кирәк. Талпан кадалган очракта кичектермичә яшәү урыны буенча шифаханәгә мөрәҗәгать итү сорала. Талпанны үзеңә тартып чыгарырга ярамый. Бу аның башы һәм кадалган борынының ярада калуына китерәчәк.