Чаллы балаларының җәйге ялын оештыруга 335 млн сум тотыла.

Республика бюджетыннан Чаллы балаларына ял итү өчен 200 миллион сум акча бүленгән. Калган финанслар шәһәр казнасыннан һәм әти-әниләр кесәсеннән. Бушлай юлламалар МХО катнашучыларның балаларына һәм авыр хәлле гаиләләрдә тәрбияләнүчеләргә бирелгән.

Бу җәйдә мәктәп яны, шифаханә базаларында урнашкан лагерьларда барлыгы 20 мең бала ял итәчәк. Шуларның яртысы – мәктәп янында. Мондый төр ялны Чаллының 51 мәгариф учреждениесе оештыра.

Быел ял итү программасында Чаллының 400 еллыгына, КАМАЗның 50 еллык юбилеена, халыклар бердәмлегенә багышланган чаралар каралган.

Балалар ялын оештыручы барлык урыннарны да хокук саклау органнары тикшерде. Биредә барлык тиешле таләпләр үтәлергә тиеш. Чит кешеләр балалар ял иткән урынга эләгә алмый. Туклану да контроль астында.

Татарстанда «Яшьләр һәм балалар» илкүләм проекты тормышка ашырыла.