Чаллы эшмәкәре тагын махсус хәрби операция зонасына җыена

Чаллы эшмәкәре Фәрит Зарипов тагын махсус хәрби операциядәге егетләргә гуманитар йөк илтәргә җыена. Аңа хәрбиләргә кирәк-яраклар тупларга туганнары, дуслары, эшмәкәрләр, мәктәп укучылары булыша.

«Азык-төлек, медикаментлар, дронга каршы мылтыклар,  окоп шәмнәре, кием-салым җыела. Хәзер анда пычрак, егетләргә аяк киемнәре дә артык түгел. Китерсәгез яисә акчалата ярдәм итсәгез яхшы булыр иде. Шөкер, изге эштән шәһәрдәшләр читтә калмый. Эльмира Мөҗәһитова дарулар китерде, тартма-тартма окоп шәмнәре китерүчеләр дә бар», – ди Фәрит Зарипов. 

Ул солдатларга окоп шәмнәре ясаган, хатлар язган мәктәп укучылары белән очрашулар үткәрә. Анда ялга кайткан хәрбиләр дә катнаша.

Шундый очрашуларның чираттагысы 22нче мәктәптә булган. «Укучыларга хәрбиләрнең эмоцияләре, тормыш-көнкүрешләре турында сөйлим. Алар йотлыгып тыңлыйлар. Хәрбиләр укучыларга да рәхмәтлеләр. Балалар ясаган рәсемнәр, хатлар махсус хәрби операция зонасындагы егетләрнең күңелен нечкәртә», – диде ул «Шәһри Чаллы» газетасы журналистына. 

Фотолар Фәрит Зариповтан алынды